ကမ္ဘာ့ ပထမဆုံး အာကာသဆိပ်ကို ၉ဝ ရာခိုင်နှုန်း တည်ဆောက် ပြီးစီး

Virgin ကုမ္ပဏီ၏ အာကာသယာဉ်များ ပျံတက်ရန် ကမ္ဘာ့ ပထမဆုံး ပုဂ္ဂလိက အာကာသဆိပ်ကို ၉ဝ ရာခိုင်နှုန်း တည်ဆောက် ပြီးစီးပြီ ဖြစ်ကြောင်း စက်တင်ဘာလ ၆ ရက်နေ့ သတင်းများက ဖော်ပြသည်။ Virgin ကုမ္ပဏီ၏ ပထမဦးဆုံး အာကာသ ခရီးစဉ်ကို ၂ဝ၁၃ ခုနှစ်တွင် စတင်မည် ဟု ဆိုသည်။ သူဌေးကြီး ဆာရစ်ချက် ဘရန်ဆန်၏ Virgin Galactic ကုမ္ပဏီသည် နယူး မက္ကဆီကို ပြည်နယ် လက်စ်ခရူဆေး ဒေသရှိ မြေ အကျယ် ၁၈ဝဝ ဧကတွင် အာကာသဆိပ်ကို တည်ဆောက်နေခြင်း ဖြစ်သည်။

တည်ဆောက်မှုမှာ ၉ဝ ရာခိုင်နှုန်း ပြီးစီး နေပြီ ဖြစ်ရာ အပြည့်အစုံ ပြီးစီးရန် အတွက် လ အနည်းငယ်သာ လိုတော့သည် ဟု ဆိုသည်။ အဆိုပါ ကုမ္ပဏီမှ ပြောရေးဆို ခွင့်ရ အမျိုးသမီးက ကုမ္ပဏီ၏ ပထမဆုံး အာကာသ ခရီးစဉ်ကို ၂ဝ၁၃ ခုနှစ်၏ ပထမ သုံးလပတ် အတွင်း စတင် နိုင်လိမ့်မည် ဟု ဆိုသည်။